MATERI SERMON EVANGELIUM

SERMON EVANGELIUM TU MINGGU II. SET. EPHIPANIAS 
 (19 Januari 2014)

DI GKPI RESORT KHUSUS TARUTUNG KOTA

================================================

Nas      : Jesaya 49: 1-7

I.  Patujolo

Jesaya (di hata Heber Yesya’yahu na marlapatan: Debata do haluaon) ima sahalak Panurirang na dijou jala dipillit Debata laho manurirangi di ngolu ni bangso Israel. Songon naung tangkas taboto, ia buku ni panurirang Jesaya dibagi do tolu rongkom, ima:

1.     Bindu 1-39 manaringoti taringot tu panurirangon si Jesaya di tongatonga ni bangso Israel andorang so habuangan.
2.     Bindu 40-55 manaringoti taringot tu panurirangon si Jesaya di tongatonga ni bangso Israel uju di habuangan.
3.     Bindu 56-65 manaringoti taringot tu panurirangon si Jesaya di tongatonga ni bangso Israel dung mulak sian habuangan.

Uju di parhatobanon (habuangan) do bangso Israel disuriranghon si Jesaya turpuk on, di tongatonga ni keadaan na magopu roha ni bangso Israel jala na so hot hadirion nasida. Di partingkian na masa i, parsorion do na ro tu bangso Israel, jala mian sungkunsungkun di roha nasida mandok atik na so margogo be Debata mangurupi hami, manang atik na gumogo do halak Babilonia martimbangkon Debata? Di parsorion na masa i, dihirim nasida do pangapulon asa adong na paluahon nasida sian habuangan i. Marnida na masa i, marsoara do Debata tu bangso Israel marhite panurirang Jesaya laho pasahathon barita las ni roha. 

II.  Hatorangan ni Turpuk

Ay. 1-4

Di bagasaan turpuk on dibaritahon do sada pangokuan sian Panurirang Jesaya taringot tupangarimangon na bagas na patubu panandaon na tangkas tu Debata, di partinandaanna di Debata nang nasa pambahenanNa. Dipaandar do taringot tu panghobasionna gabe panurirang, ndada jumolo si Jesaya mangalului Debata, alai jumolo do Debata manopot si Jesaya, gariada tagan di bortian dope ibana. Dipajojor si Jesaya do pambahenan ni Debata na manjou goarna tagan dibortian dope, dibahen pamanganna songon podang na tajom, jala diondingi ibana marhite pangalinggoman na sian Debata. Anggo apala sintuhuna, dipajojor si Jesaya do ia pardalanan ni ngoluna nang ulaon panurirangonna, Debata do marmudu, mangaramoti, mangalehon gogo, jala memperlengkapi ibana, na tongtong dipataridahon Debata marhite huaso nang holong ni rohaNa.  

Ay. 5-7

Didok Jahowa do tu bangsoNa: “Songon tano hudon di bagasan tangan ni sitopa hudon, songon i do hamu dibagasan tanganKu ale pinompar ni Israel” (Jer. 18:6). Domu tu pandohan i do nang panandaon ni si Jesaya didirina. Diparhatopot ibana do na Debata jumadihon ibana, jala hinorhon ni i tubu pangantusion di bagasan dirina na Debata do nampuna ibana jala namangaturhon parngoluonna.

Di situasi na masa di ngolu (pardagingon nang partondion) ni bangso Israel uju panghobasion ni si Jesaya gabe panurirang, tardok dokdok do ulaon parsuruon napinasahat ni Debata tu ibana, ima patindang angka marga ni si Jakob, angka dongan sabangsona, naung mandao sian hata nang lomo ni roha ni Debata. Alai nang pe dokdok, ndada gabe biar (tahutan) roha nang diri ni ibana hinorhon ni i. Dipatuduhon ibana do haundukon nang hasatiaonna laho pasahathon Hata ni Debata marhite ulaon manogihon mulak bangso Israel asa mangolu dibagasan haimbaruon di ngolu pardagingon nang di ngolu partondion.   

III.    Sipahusorhusoron

Molo borhat hita sian haporseaon paboa Debata na mangolu huhut mangula di tingki ni si Jesaya, laos Ibana do Debata na mangolu huhut mangula di pardalanan ni ngolunta di parngoluan on. Ndada hita jumolo mangalului Debata, alai tung asi ni rohaNa do manopot hita jala patandahon diri nang ulaonNa di bagasan ngolunta. Ragam ni angka hamaolon na dokdok naung masa di partingkian on, tung so margogo do hita laho mangadopi i molo mangasahon hadirionta. Alai nunga dipapatar Debata ulaonNa sia na robi tolhas tu ombas on, paboahon na umbalga do huaso dohot gogoNa sian saluhut ragam ni angka hamaolon na dokdok i. Apoapo na tung mansai arga do on tu hita na porsea di Debata, patubuhon hiras nang dohot pos ni roha na holan tu Debata.

Partondi na togar jala biar mida Jahowa, ido na diulahon panurirang Jesaya di ulaon naung pinasahat ni Debata tu ibana. Ndada gabe disonggopi tondi hatahuton ibana laho marbarita nauli di tongatonga ni ngolu bangso Israel, ima dongan sabangsona. Alai andul sian i, togar jala bonar do ibana manghatindangkon jala pasingothon bangso Israel asa paimbaruhon diri nang roha di adopan ni Debata. Panjouon, pamilliton, nang panuruon naung binahen ni Debata tu panurirang Jesaya, suang songon i do nang na ingkon masa tu angka na manghabiari ibana (tarlumobi tu angka naung manjalo ulaon partohonan). Naeng ma nian mansai suan tu roha nang pingkiran, lumobi saurdot tu parange, sintuhu ni parsuruon ni Tuhan i. Ingkon saor do Hata ni Debata ima barita las ni roha, paminsangon nang uhuman, tu ganup jolma na so ingkon marnida rupa. Unang mabiar manang tahutan, ai Debata do na mansuru hita, ala ni i ingkon adong pos ni roha, sai na tongtong do didongani na sinuruNa (pat. Mat.28: 20b). Amen.

Created By: Vik. Jefri Putra Tampubolon, S.Th