MATERI SERMON EVANGELIUM

SERMON EVANGELIUM TU MINGGU I. SET. EPHIPANIAS  (12 Januari 2014)

DI GKPI RESORT KHUSUS TARUTUNG KOTA

=============================================

Nas      : Mateus 3: 13-17

I.    Patujolo

Johannes na marlapatan ‘Yahweh is Gracious’ (Tuhan itu baik serta penuh kasih karunia), ima  anak ni si Sakaria dohot inana si Elisabet (Luk.1:5-25, 57-66). Ulaon ni Johannes Pandidi ima:

a.    Laho paradehon dalan tu haroro ni Jesus. Molo dipartingkian i, molo naeng ro sahalak raja di sada inganan, sai jumolo do ro utusanna laho paradehon angka na ringkot. Jesus ima Raja, jala si Johannes Pandidi maniop sada ulaon na mansai ringkot, ima paradehon dalan tu haroro ni Jesus jala paradehon angka jolma laho manjalo haroro ni Tuhan Jesus. Ingkon siaphononna do angka dosa na mangkangkungi na mambahen manisia i manulak manang ndang manjalo haroro ni Kristus i. Ido umbahen na di soarahon Johanes Pandidi: “Pature hamu ma dalan di Tuhan i, pahornop hamu ma sidalananna i”.

b.    Mambaritahon Barita Nauli. Dibaritahon ibana do barita nauli ima Hata ni Debata tu saluhut jolma. Halak na torop i dilehon do rohana nang tingkina laho mandalani luat na dao holan laho manangihon Hata ni Debata. Di partingkian nuaeng on mansai tamba bilangan ni angka halak Kristen na mamillit huria na jumonok sian jabuna, ndnag parduli be molo huria manang gareja i nunga mansai marasing na niajarhonna sian Hata ni Debata denngan manang so denggan. On ma sada sikap na sala, asa jamot hita di jaman nuaeng na so olo be susa jolma i, manang na holan mengandalkan instant. Ingkon laho do hita tu huria na tingkos jala bonar tung dao pe jarak manang ingananna.

II.   Hatorangan ni Turpuk

Ay. 13-15

Dibagasan turpuk on, dibaritahon na ro do Jesus sian Galilea tu Batang Aek Jordan laho padidihon Ibana tu si Johannes. Pandidion na pinatupa ni si Johannes Pandidi ima pandidion tu jolma pardosa asa gabe ias sian angka dosa jala mangolu dibagasan napaubahon roha. Di tradisi ni halak Jahudi, marhite pandidion, songon halak na paias diri (daging) marhite aek na mabaor sian ginjang tu toru, na marlapatan do i, manggombarhon Tondi ni Debata na tuat sian Banua Ginjang laho paiashon diri sian dosa. I do umbahen na dihatahon Johannes Pandidi: “Ia ahu, aek do hudidihon tu hamu mandokkon paubahon roha; alai andul gumogo do na ro sian pudingku, gari mamboan sipatuna hurang tama dope ahu. Didihonon ni i do tu hamu Tondi Parbadia dohot api!” (ay.11). Diboto jala ditanda si Johannes Pandidi do Jesus. Ala ni i manjua do ibana uju dipangido Jesus asa dipadidihon, alai ndung ditiroi Jesus ibana marhite pandohan: “Songon i ma jolo! Ai tama do tapajongjong nasa hatigoran!, gabe dioloi si Johannes ma padidihon Jesus. Jesus ima sahalak na tigor jala na bonar, alai boasa ingkon dipangido Ibana asa dipadidihon? Pandidion na pinangido ni Jesus ndada laho mangido pertobatan, alai laho patuduhon tanda “solidaritas” ni Jesus tu jolma manisia. “Solidaritas” marlapatan do i, Jesus naeng patuduhon hasatiaonNa di panuruon ni Debata (mendahulukan kehendak Allah daripada kehendak pribadi) ima na gabe sipadame jolma maradophon Debata, jala naeng patuduhon haserepon ni rohaNa mida jolma manisia, marsaor do Ibana tu saluhut jolma naung olo rade manopoti dosa jala paubahon roha.

Ay. 16-17

Halongangan, i do na masa uju tardidi Jesus di Batang Aek Jordan. “Mungkap ma langit, jadi tarida ma mijur Tondi ni Debata songon darapati sumonggopi Ibana”. Hasatiaon ni Jesus tu panuruon ni Debata dipataridahon Debata do marhite tanda halongangan bolon. Mijur Tondi ni Debata marrupa darapati naeng patandahon songon darapati (di tradisi Jahudi) na gabe pelean tu Debata, songon i ma gombaran ni hadirion ni Jesus ima sahalak na tigor, marroha na serep, jala na badia. Disoarahon Debata sian Banua Ginjang: “On do Anakku, Haholongan i; halomoan ni rohangku do Ibana!” naeng patandahon tu ganup jolma na Jesus do Anak ni Debata naung dibagabagahon di Padan Na Robi: gabe Raja laho manguluhon huhut manggomgomi bangsoNa; gabe Sipalua laho paluahon saluhut jolma manisia marhite hamamateNa jala haholongan ni roha ni Debata.      

III.    Sipahusorhusoronta

Torop ni jolma na mandohoti pandidion ni si Johannes Pandidi na dibaritahon marhite turpuk on, sipardohot do hita dibagasan situasi i. Hita raphon sude angka parungkilon dohot parsorion hinorhon ni dosa, nunga be tardidi raphon Tuhanta i. Jala sipardohot do hita marnida tanda halongangan na masa uju i. Ephipanias marlapatan: hapapatar. Di Johanes 20: 29b, didok Tuhanta Jesus do: Martua ma angka na porsea, atik pe so diida! Marhite tanda halongangan i, nunga dipatandahon Debata hapapatarNa tu saluhut jolma nang tu hita saluhutna marhite Jesus Kristus, Anak haholonganNa i. Jesus Kristus nunga ro tu portibi on gabe Raja jala Sipalua hita jolma, patuduhon na tongtong do marholong ni roha Debata mida hita jolma. Dihaholongi jala dihalomohon Debata do Tuhanta Jesus, nang hita pe naung gabe siihuthon Kristus, hot do haholongan dohot halomoanNa tu hita. Boha do hita dipardalanan ni ngolunta: hot do holong ni rohanta tapatuduhon tu Debata nang tu donganta jolma? Jala hot do tapatuduhon songon tanda nahinalomohon ni Debata hita? Amen.

Created By: Vik. Jefri Putra Tampubolon, S.Th