MATERI SERMON EVANGELIUM

SERMON EVANGELIUM TU MINGGU IV. SET. EPHIPANIAS  (02 Februari 2014)

DI GKPI RESORT KHUSUS TARUTUNG KOTA

==================================================

Nas      : Mika 6: 1-8

I.     Patujolo

Mika (hata heber ‘mikhayehu’ namarlapatan: ise ma tudos tu Jahowa), ima sahalak panurirang namanurirangi ditongatonga ni bangso Israel hirahira taon 725-701 BC (andorang so Kristus), ima uju panggomgomion ni raja Ahas dohot raja Hiskia. Di hatiha i, dibagasan na porsuk do ngolu ni bangso Israel hinorhon ni pangalaho dohot hajahaton naung diulahon nasida maradophon dongan jolma tarlumobi maradophon Debata. Masa do hatiha i angka na mongkus di arta mamupusi angka na pogos (Mik. 2:1+8), jala angka sintua ni Malim nasida pe nunga mangulahon dosa ima marhite naung olo ‘manjalo sisip angka induk nasida mandabu uhum’ (pat. Mik. 3: 11), jala nunga tahutan laho maminsang na sala, ala nunga gumodangan tingki dohot gogo holan laho pasarisari ngoluna. Alani i, marsoara ma panurirang Mika tu bangso Israel palumbahon na ingkon uhumon ni Debata ma bangso Israel. Alai baliksa, na boi mombun do rimas ni Debata, marasi ni roha, jala marroha mangulahi mida bangso Israel,  molo olo bangso i mulak tu Debata, mangolu dibagasan hasatiaon, jala olo paubahon roha.              

II.  Hatorangan ni Turpuk

Ay. 1-2

Panguhuman ni Debata marnida ngolu ni bangso Israel, ido na sinuriranghon ni panurirang Mika dibagasan turpuk on. Nunga tung mansai rumar pardalanan ni ngolu bangso hasurunganNa i, na so marhabiaran be mida Debata. Alani i disoarahon panurirang Mika, Debata laho marparbadaan (berperkara) tu bangsoNa marhite pasonggophon paruhuman tu tongatonga ni bangso Israel di adopan ni angka dolok dohot di adopan ni ojahan ni tano (dasar-dasar bumi). Sada sungkunsungkun: boasa ingkon di adopan ni angka dolok dohot ojahan ni tano, paruhuman i dipatupa Debata? (pat. Psalmen 148 dohot Psalmen 150).         

Ay. 3-5

Diparuhuman i, disoarahon Debata tu bangso Israel marhite panurirangNa na mandok: “Aha do uhumhu na sega tu ho, ale bangsongku? Marhitehite aha tahe ho hulojai? Alusi ma ahu! Ala na hutogihon i ho ulaning ruar sian tano Misir, jala hupalua ho sian bagas parhatobanan i? Husuru si Musa, si Aron dohot si Miriam manguluhon ho?” Sungkun-sungkun na tung mansai bagas do on tu bangso Israel laho manungguli taringot tu saluhut angka nauli jala na denggan naung dibahen Debata di pardalanan ni ngolu bangso i. Nunga dipalua Debata bangso i sian parhatobanon Misir, disarihon jala tongtong do diramoti Debata pardalanan ni ngolu nasida sahat tu tano Kanaan, alai boasa ma tung so tuk nasida pasonanghon roha ni Debata? Hasatiaon, ido na tongtong dipatuduhon Debata tu bangsoNa, alai boasa ma bangso i ndang mangolu dibagasan hasatiaoan? Aha do na mangonjar roha ni bangso i na gabe manghorhon sogo ni roha mida Debata?  

Ay. 6-8

“Martua do halak na manangihon hata ni Debata, na umpeopsa, jala na mangulahonsa”. Haradeon ni roha laho manangihon, mameop, jala mangulahon hata nang lomo ni roha ni Debata, ido sasintongna na pinangido ni Debata sian bangsoNa marhite na tongtong patuduhon ngolu dibagasan hasatiaon, holong ni roha, jala martoruk ni roha. Ndada pelean na jotjot dipasahat bangso i na tung mansai dihalomohon Debata, alai andul sian i ngolu nasida na gabe pelean namangolu, ido na dihalomohon Debata (pat.Rom.12: 1). Alani i, ditongos Debata do panurirang Mika tu bangso Israel, patolhashon hata ni Debata asa mulak bangso i tu Debata tumadingkon dalanna marhite na patuduhon hamubaon ni roha, pingkiran, nang parange, asa unang hona uhuman ni Debata nasida. 

III.   Sipahusorhusoronta

Parngoluon ni ganup naung porsea tu Debata ima na tongtong patuduhon hasatiaon songon pandohan di hata batak na mandok: “togu urat ni bulu, toguan urat ni padang, togu nidok ni uhum tobuan nidok ni padan”. Togu ni padan ido manggombarhon hasatiaon na so holan di hata alai tarida di bagasan parulaon. Jahowa, ima Debata na satia jala hot ro di saleleng ni lelengna, ala ni naeng ma ganup jolma na porsea mangolu jala manghangoluhon hasatiaon na sian Debata di pardalanan ni ngolu.

Sungkunsungkun na pinatolhas ni Debata tu bangso Israel marhite panurirang Mika, sungkunsungkun tu sude jolma na porsea do i di masa sinuaeng on, tarlumobi tu angka jolma naso gira mananda asi ni roha dohot denggan basa ni Debata. “Jikalau pada masa kini kita telah menjadi pribadi yang menerima cara-cara dunia yang telah menjadi fasik sehingga menciptakan pribadi yang tidak setia kepada Allah sesuai standar-standar kebenaranNya (Hukum dan Firman), pada hakekatnya hal itu terjadi dan tercipta adalah bukan karena Allah tidak setia kepada kita, akan tetapi sebaliknya karena keinginan kita sendirilah yang tidak mau dan tidak mampu untuk berterima kasih atas kasih karunia dan kasihNya.

Tudos tu hata ni Endenta na mandok: “Sai mulak, sai mulak ho naung lao jalang i? Ai na dao ho nuaeng holang sian tuam. O parjalang ho: mulak, mulak ma ho! mulak, mulak ma ho. Asa naeng ma ganup na porsea marhamulakon tu Debata marhite na olo jala ungkap paimbaru roha, pingkiran, nang diri na gabe tarida dibagasan hasatiaon, holong ni roha dohot toruk ni roha. Apostel Paulus mangapoi saluhut na porsea: “Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha. Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan. (Rom 12: 1-2). Amen.

Created by: Vik. Jefri Putra Tampubolon, S.Th